Khaladaadka WFP ee ku aaddan maamulka SSC-Khaatumo
WFP waxay soo saartay waraaq ay ku shaacinayso hakinta hawlaheedii gargaarka ee SSC-Khaatumo, sababo la xiriira dhacdooyin boob ah oo isdaba joog ah oo ka dhacay degmada Buuhoodle. Si kastaba ha ahaatee, waxaa jira khaladaad iyo arrimo ku saabsan hab-dhaqanka WFP ee khuseeya maamulka SSC-Khaatumo, ayna ku qeexday waraaqdii ay 27ka Bishan la wadaagtay xafiiska madaxwayne ku xigeenka Puntland, kuwaas oo ay muhiim tahay in la caddeeyo lagana jawaabo:
1. Ku Eedeynta Maamulka SSC-Khaatumo Dayacaadda Amniga
- WFP waxay ku sheegtay waraaqdeeda in amni-darrada ka jirta SSC-Khaatumo ay sababtay in la boobo raashin gargaar ah. Si kastaba ha ahaatee, maamulka SSC-Khaatumo laguma wargelin si rasmi ahna looma gaadhsiin waxyaabaha khuseeya mashaariicdaas ama walaacyada la xiriira amniga si ay uga hawlgasho.
- Tani waxay muujinaysaa in WFP aysan la shaqeyn maamulka si toos ah, taas oo qeyb ka ah xeerarka maamulka SSC-Khaatumo ee ku aaddan in hay’adaha samafalka ay iska diiwaan geliyaan si ay uga hawlgalaan deegaannada SSC-Khaatumo, loona sugo amniga mashaariicda ay fulinayaan.
- Waxaana jira haayado maxaliya iyo kuwo kale oo caalamiya oo ka hawlgala deegaanadda SSC-Khaatumo wax amni daro ahna aan soo sheegin.
2. Fulinta Mashaariic Soo Maray Maamullo Kale:
- WFP waxay ku andacootay inay ka hawlgaleysay SSC-Khaatumo iyadoo ka duulaysa xafiiskeeda Garowe iyo hay’ado kale oo wada-shaqeyni ka dhaxayso. Tani waxay muujinaysaa in WFP ay adeegsanaysay maamullada kale si ay uga hawlgasho deegaannada SSC-Khaatumo, halkii ay si toos ah ula shaqeyn lahayd maamulka SSC-Khaatumo.
- Maamulka SSC-Khaatumo horay ayuu ugu wargeliyay dhammaan hay’adaha samafalka in aysan ka hawlgalin deegaannadooda iyagoo u soo maraya maamulo kale, balse ay tahay inay si toos ah isaga diiwaan geliyaan SSC-Khaatumo.
3. Wargalin la’aan iyo Ogaysiin La’aan
- WFP waxay ku guul-darreysatay inay si toos ah u wargeliso ama uga howlgasho maamulka SSC-Khaatumo si ay u wada shaqeeyaan, taas oo keentay dayacaad ku timid mashaariicdii loogu talagalay dadka deegaanka.
- Mashruucyadaas oo ay ka mid yihiin barnaamijyada nafaqada iyo raashinka gargaarka ayaa qaarkood lumay ama aan si habboon loo gaadhsiin dadkii loo baahnaa.
4. Ku Xadgudubka Jiritaanka iyo Madaxbannaanida Maamulka
- Hab-dhaqanka WFP ee ah inay soo marto maamullada kale, halkii ay si toos ah ula xiriiri lahayd maamulka SSC-Khaatumo, waa mid aan waafaqsaneyn madax-bannaanida maamulka deegaanka.
Si looga fogaado khaladaadka noocan ah, waxaa muhiim ah in maamulka SSC-Khaatumo Ka jawaabo waraaqdaas isaga oo u sheegaya dhamaan xadgudubyada ay qiratay WFP.
Sido kalena ka codsanaya inay raaligalin ka bixiso arinkaas kuna amraya qodobadda soo socda:
- WFP waa inay si rasmi ah iskaga diiwaan geliso SSC-Khaatumo hadii ay rabto inay ka hirgaliso mashariic deegaannada SSC-Khaatumo.
- Hay’adaha samafalka ay si toos ah ula shaqeeyaan maamulka SSC-Khaatumo halkii ay u soo mari lahayeen maamullada kale.
- WFP waa inay si hufan ula wadaagto maamulka SSC-Khaatumo dhammaan macluumaadka iyo qorsheyaasha ku saabsan hawlaha ay doonayaan inay ka fuliyaan deegaanka.
- SSC-Khaatumo waa inay caddayso inay damiin ka ahayn amniga iyo hirgalka wixi mashaariic ah ee soo mara maamulada kale.
Intaasi waa tallaabooyin muhiim ah oo lagu xaqiijinayo in gargaarka bani’aadamnimo uu gaaro dadkii loogu talagalay, iyadoo la dhowrayo madaxbannaanida iyo sharafka maamulka SSC-Khaatumo.
