Warbixin ka soo baxday wargeyska *The Independent* ee Ingiriiska ayaa iftiimisay sare u kaca colaadda Ruushka iyo Yukrayn, iyadoo la soo xigtay digniin uu soo saaray Ra’iisul Wasaaraha Boolaand (Pland), doonaald tusk (Donald Tusk), oo sheegay in colaaddu ay gashay “marxalad xasaasi ah” isla markaana khatarta dagaalka saddexaad ee adduunka ay tahay mid “dhab ah oo halis ah.”
Arrintani waxay timid ka dib markii Ruushka uu ku riday gantaal cusub oo ah nooca xawaarihiisu aadka u sarreeyo, taas oo jawaab u ahayd isticmaalka gantaallada dheer ee nooca *Storm Shadow* oo uu ingiriisku siiyay Yukrayn (Ukraine) iyo kuwa kale oo Mareykanka uu ku taageeray, kuwaas oo lagu bartilmaameedsaday Gudaha Ruushka.
Madaxweynaha Ruushka, Filaadmiir Buutin (Vladimir Putin), ayaa cambaareeyey weerarradaas, isagoo sheegay in Ruushka uu xaq u leeyahay inuu beegsado waddan kasta oo reer galbeed ah oo taageera Ukraine iyadoo la adeegsanayo hub noocan oo kale ah. Wuxuu ku hanjabay in Ruushka uu sii wadi doono isticmaalka gantaalkan cusub oo uu ku dooday inay adag tahay in la joojiyo, sida ku xusan warbixinta.
Wargeyska ayaa sheegay in Putin uu wax ka beddelay aragtida Ruushka ee ku saabsan hubka nukliyeerka, isagoo ku dhawaaqay in weerar kasta oo Ruushka lagu qaado oo ay taageerayaan quwad nukliyeer ah, xitaa haddii uu yahay mid aan nukliyeer ahayn, loo aqoonsan doono weerar ay si wadajir ah u sameeyeen waddanka weerarka qaaday iyo quwadda taageertay.
Dhinaca kale, Ra’iisul Wasaaraha dalka hangari (Hungary), Viktor Orbán, ayaa sheegay in ay qalad tahay in la dhayalsado jawaabaha Ruushka, isagoo ka digay in wax ka beddelka aragtida nukliyeerka ee Ruushka aan loo arkin khiyaano ama kaliya digniin.
Wasaaradda Gaashaandhigga Mareykanka (Pentagon) ayaa xaqiijisay in gantaalka ay Ruushka ku rideen uu ku salaysan yahay naqshadda gantaalka ballistic-ga ah ee *RS-26*, kaas oo qaadi kara madax nukliyeer ah. Sirdoonka Ukraine ayaa sheegay in gantaalkan uu ku socday xawaare ah *Mach 11* (oo u dhiganta qiyaastii 13,464 km/saacaddii), isla markaana uu bartilmaameedkiisa gaaray 15 daqiiqo gudahood, sida ay warbixintu sheegtay.
Ficillada Ruushka ayaa ka careysiisay Yurub, iyadoo qaar ka mid ah hoggaamiyeyaasha reer galbeedka, oo uu ku jiro Wasiiradda Difaaca ee Ingriiska, Maria Eagle, ay ku adkeysteen inay taageerayaan Ukraine. Dhinaca kale, Wasiirka Arrimaha Dibadda ee Czech Republic, Jan Lipavský, ayaa ku tilmaamay weerarka Ruushka mid loogu talogalay inuu cabsi geliyo Ukraine iyo Yurub.
Ra’iisul Wasaaraha Ingriiska, Keir Starmer, ayaa isna sheegay in inkastoo Ingriisku uusan si toos ah dagaal uga qaybqaadan, haddana dagaalka Ukraine uu yahay mid muhiim ah si loo hubiyo in Ruushka uusan guuleysan, isagoo ku tilmaamay dagaalkan mid ku saabsan nabadgelyada Yurub.
Xigasho: Wargaysaka INDEPENDENT
