Waxaa galabta garoonka weyn ee Cabdi Bile Cabdi ee magaalada Laascaanood ka dhacday ciyaartii labaad ee tartanka koobka degmooyinka ee maamulka SSC-Khaatumo, taas oo ay isku haleeleen kooxaha matalaya Degmooyinka Laascaanood iyo Taleex.
Ciyaarta oo ahayd mid aad u xiiso badan ayaa kusoo dhammaatay barbaro goolal la’aan ah (0-0), iyadoo labada kooxood ay muujiyeen xirfad wanaagsan, hase yeeshee aysan midkoodna helin fursad ay gool ku dhaliyaan.
Kulankan wuxuu qeyb ka ahaa heerka guruubyada ee tartanka, waxaana la arkayay taageerayaal badan oo labada degmo ka kala socday oo si weyn u dhiirrigelinayay kooxahooda. Tani waxay ahayd ciyaartii labaad ee tartanka, iyadoo uu si wanaagsan u socdo isdhexgalka dhalinyarada iyo horumarinta ciyaaraha maamulka SSC-Khaatumo.
Kulamada soo socda ayaa la filayaa in xiiso iyo tartan dheeri ah lagu arko, maadaama koox walba ay u dagaallamayaan hanashada koobkan muhiimka ah.
